रुपन्देही जिल्लाको गैडहवा गाउँपालिका–२, ननौली निवासी १२ वर्षीय सुरज चौबे यतिबेला स्थानीय क्षेत्रमा चर्चाको केन्द्र बनेका छन्। माता श्री शशिकला चौबे र पिता अकलेश चौबे का सुपुत्र सुरजले सानै उमेरमा धार्मिक ज्ञान र संस्कारले सबैलाई प्रभावित बनाएका छन्।

हाल कक्षा ६ मा अध्ययनरत सुरज श्री लुम्बिनी सनातन संस्कृत विद्यापीठ गुरुकुलम मा अध्ययनरत छन्। उक्त गुरुकुलम लुम्बिनी सांस्कृतिक नगरपालिका–१२, आमा क्षेत्रमा अवस्थित रहेको छ।

गुरुकुलमका प्रधान आचार्य पण्डित शिवम् पाण्डेयको मार्गदर्शनमा उनले वैदिक शिक्षा हासिल गरिरहेका छन्।उनले गत दशैंको नवरात्रि पूजादेखि लिएर हालसम्म करिब ४ वटा विवाह तथा विभिन्न कथा–पूजा सफलतापूर्वक सम्पन्न गरिसकेका छन्।

हालै भुजौलीमा आयोजित एक विवाह समारोहमा उनले परम्परागत विधिअनुसार प्रवीणतापूर्वक विवाह सम्पन्न गराएपछि सबैको ध्यान आफूतर्फ खिचेका थिए।

विवाहमा सहभागी जन्ती, गाउँले तथा आफन्तजनले यति सानो उमेरमा यस्तो गहिरो ज्ञान देख्दा आश्चर्य व्यक्त गरेका थिए। “१२ वर्षको बालकमा यति ठूलो ज्ञान कहाँबाट आयो?”

भन्ने प्रश्न धेरैको मनमा उठेको थियो।सुरज चौबे जस्ता प्रतिभाशाली बाल पुरोहितले सनातन संस्कृतिको संरक्षण र प्रवर्द्धनमा महत्वपूर्ण योगदान पुर्‍याउने विश्वास गरिएको छ।