कपिलबस्तु, जेठ १० गतेकपिलवस्तु, शिवराज — शिवराज नगरपालिका–११ स्थित दुर्गेश नन्दनी आधारभूत विद्यालय मा दुई कोठे नयाँ विद्यालय भवन निर्माणको शिलान्यास गरिएको छ।

भवनको शिलान्यास अभिषेक प्रताप शाह ले गर्नुभएको हो।सिद्धार्थ सामाजिक विकास केन्द्र र शिवराज नगरपालिका वडा नं. ११ को संयुक्त लगानीमा निर्माण हुन लागेको भवनको कुल लागत ३६ लाख ६ हजार १ सय रुपैयाँ रहेको छ।

यसमध्ये सिद्धार्थ सामाजिक विकास केन्द्रको ३१ लाख ६ हजार १ सय रुपैयाँ तथा वडा कार्यालयको ५ लाख रुपैयाँ लगानी रहने जानकारी वडा अध्यक्ष रामेश्वर बर्मा ले दिनुभयो।शिलान्यास कार्यक्रममा बोल्दै सांसद शाहले विद्यालयको भौतिक पूर्वाधार विकाससँगै गुणस्तरीय शिक्षामा समेत विशेष ध्यान दिनुपर्ने बताउनुभयो।

उहाँले स्थानीय आवश्यकता र भौगोलिक अवस्थाअनुसार विद्यालय भवन निर्माण गर्नुपर्नेमा जोड दिनुभयो।कार्यक्रममा अजय थापा ले सिद्धार्थ सामाजिक विकास केन्द्रले शिक्षा क्षेत्रमा निरन्तर सहयोग गर्दै आएको उल्लेख गर्दै शिवराज नगरपालिकाले माध्यमिक तहसम्म निःशुल्क शिक्षालाई प्राथमिकतामा राखेर काम गरिरहेको जानकारी दिनुभयो।त्यसैगरी, सिद्धार्थ सामाजिक विकास केन्द्रका कार्यक्रम संयोजक अजय चौधरी ले निर्माण कार्य निर्धारित समयभित्र गुणस्तरीय रूपमा सम्पन्न गरिने प्रतिबद्धता व्यक्त गर्नुभयो।

शिलान्यास कार्यक्रममा समाजसेवी प्रेम रायमाझी, केसरी जयसवाल लगायत स्थानीय जनप्रतिनिधि, शिक्षाप्रेमी तथा सर्वसाधारणको उल्लेखनीय सहभागिता रहेको थियो।भवन निर्माण सम्पन्न भएपछि विद्यालयको भौतिक पूर्वाधार थप सुदृढ हुने र विद्यार्थीहरूको पठनपाठन वातावरण अझ सहज तथा प्रभावकारी बन्ने अपेक्षा गरिएको छ।