कपिलवस्तु भदौ ३१ गते । नेपाली कांग्रेस कपिलवस्तुमा १५औँ महाधिवेशनको तयारी अघि बढिरहेका बेला पार्टीभित्र देखिएको असन्तुष्टि सम्बोधन गर्दै एकताको महाधिवेशन गर्नुपर्ने माग उठेको छ।

होटल शंकरमा बुधबार आयोजित पत्रकार सम्मेलनमा जिल्ला, क्षेत्र तथा पालिका तहका नेता कार्यकर्ताले पार्टी सञ्चालनमा विधि विधान र आन्तरिक लोकतन्त्रलाई प्राथमिकता दिनुपर्ने बताएका छन्।

एकताको महाधिवेशन पक्षधर समूह ले जारी गरेको संयुक्त विज्ञप्तिमार्फत तल्लो तहबाट भएका वैधानिक सिफारिसको सम्मान गर्न निर्वाचित पदाधिकारीको अनधिकृत फेरबदल रोक्न तथा महाधिवेशन प्रक्रिया पारदर्शी बनाउन केन्द्रीय नेतृत्वको ध्यानाकर्षण गराइएको छ।

समूहले विगतका कारबाही तथा संगठनात्मक निर्णयप्रति पनि प्रश्न उठाएको छ। विज्ञप्तिमा पछिल्ला वर्षहरूमा सात सयभन्दा बढी नेता कार्यकर्तामाथि स्पष्टीकरण तथा कारबाहीको प्रक्रिया अघि बढाइएको उल्लेख गर्दै क्षेत्रीय तथा इकाइ तहका निर्वाचित सभापतिलाई व्यक्तिगत वा गुटगत स्वार्थका आधारमा हटाउने तथा पद परिवर्तन गर्ने गरिएको आरोप लगाइएको छ।

स्थानीय तहबाट सर्वसम्मत रूपमा सिफारिस गरिएका उम्मेदवारलाई बेवास्ता गरी केन्द्रबाट टिकट वितरण गरिएको विषयले कार्यकर्तामा असन्तुष्टि बढाएको समूहको दाबी छ।समूहले असन्तुष्ट नेता कार्यकर्तालाई सांगठनिक प्रक्रियामा समेट्दै सबै पक्षको सहभागिता र सहमतिमा १५औँ महाधिवेशन सम्पन्न गर्न माग गरेको छ।

माग सम्बोधन नभए महाधिवेशनका कार्यक्रम बहिष्कार गर्न बाध्य हुने चेतावनीसमेत दिइएको छ।कांग्रेसभित्र १५औँ महाधिवेशनलाई एकताको आधारमा अघि बढाउनुपर्ने आवाज पछिल्लो समय अन्य तहमा पनि उठिरहेको देखिन्छ।

पत्रकार सम्मेलनमा जिल्ला सहसचिव मो. वजीह अरसद, क्षेत्र नं. १ का सभापति अब्दुल मन्नान खान, प्रदेश सदस्य उम्मेदवार डोलकराम घिमिरे, क्षेत्रीय प्रदेश सभापति दुर्गा बहादुर केसी, कपिलवस्तु नगरपालिका सभापति खुर्शिद अहमद खाँ, जिल्ला सदस्यहरू हरि राज घिमिरे र कमल राज आचार्य, शुद्धोधन गाउँपालिका सभापति विश्वम्भर प्रसाद कुर्मी तथा मायादेवी गाउँपालिका सभापति शैलेन्द्र दिबेदी लगायत सहभागी थिए।