बुटवल । सोमबार बुटवल–पूर्व पश्चिम राजमार्ग अन्तर्गत बुटवल उपमहानगरपालिका–१० रामनगरस्थित धागो कारखाना नजिक सवारी चेकजाँचका क्रममा एक ट्राफिक प्रहरीको मृत्यु भएको छ।

दिउँसो करिब ४:०० बजे पूर्वबाट पश्चिमतर्फ जाँदै गरेको बागमती प्रदेश ०१–००३ च ००६६ नम्बरको कारले ड्युटीमा खटिएका ट्राफिक सहायक हवलदार नागेश्वर पाललाई ठक्कर दिएको हो। कोटहिमाई गाउँपालिका वडा नं. ५ निवासी ३१ वर्षीय पाल अस्थायी ट्राफिक प्रहरी पोस्ट रामनगरमा कार्यरत थिए।ठक्करबाट गम्भीर घाइते भएका पाललाई उपचारका लागि लुम्बिनी प्रादेशिक अस्पताल बुटवल लगिएकोमा अस्पतालले ४:३० बजे मृत घोषणा गरेको जनाएको छ।

कार अनियन्त्रित भई सोही स्थानमा रोकिराखिएको मधेस प्रदेश ०३–००१ क ३३१९ नम्बरको ट्रिपरलाई समेत ठक्कर दिएको प्रहरीले जनाएको छ।

घटनापछि कार र कार चालक जितेन्द्र सिंह थापा प्रहरीको नियन्त्रणमा रहेको र घटनाबारे थप अनुसन्धान भइरहेको जानकारी प्राप्त भएको छ।

: सन्दीप पौडेल