कपिलवस्तुमा धार्मिक सहिष्णुता कायम राख्न संयुक्त अपिल
कपिलवस्तु — कपिलवस्तु जिल्लामा हालै भएका धार्मिक तथा सामाजिक घटनापछि विभिन्न संघसंस्था तथा नागरिक समाजका अगुवाहरूले शान्ति, सहिष्णुता र सामाजिक सद्भाव कायम राख्न संयुक्त अपिल गरेका छन्।

महाराजगञ्ज नगरपालिका–२ मा मन्दिर तोडफोड तथा बुद्धभूमि क्षेत्रमा भएको गोलीकाण्डपछि जिल्लामा उत्पन्न तनावप्रति गम्भीर चिन्ता व्यक्त गर्दै दोषीमाथि कारबाही र घाइतेहरूको उचित उपचारको माग गरिएको छ। साथै, प्रशासनले जारी गरेको निषेधाज्ञाको पालना गर्न र कुनै पनि प्रकारका भेला, जुलुस तथा उत्तेजनात्मक गतिविधिबाट टाढा रहन आग्रह गरिएको छ।

वक्तव्यमा नेपाल बहुजातीय, बहुधार्मिक र बहुसांस्कृतिक मुलुक भएको उल्लेख गर्दै विविधतामै एकता रहेको बताइएको छ। सबै नागरिकले आ–आफ्नो धर्म, संस्कार र परम्पराको सम्मान गर्दै सहअस्तित्व र आपसी विश्वास कायम राख्नुपर्नेमा जोड दिइएको छ।

“नेपाल हाम्रो साझा फूलबारी हो, यसलाई सुन्दर, सुरक्षित र सम्मानजनक बनाउनु सबैको दायित्व हो,” वक्तव्यमा भनिएको छ। साथै, देशको संवेदनशील अवस्थालाई ध्यानमा राख्दै कुनै पनि प्रकारको हिंसा, द्वेष र विभाजनकारी गतिविधिबाट टाढा रहन आग्रह गरिएको छ।

कपिलवस्तु बुद्ध जन्मभूमि क्षेत्रसँग जोडिएको शान्तिको प्रतीक स्थल भएकाले यहाँका नागरिकले शान्ति, संयमता र सहिष्णुताको उदाहरण प्रस्तुत गर्नुपर्नेमा पनि जोड दिइएको छ।
यो संयुक्त अपिल गैरसरकारी संस्था महासंघ, नेपाल पत्रकार महासंघ, दलित सामाजिक विकास केन्द्र, नागरिक समाज तथा अन्य विभिन्न संघसंस्थाका प्रतिनिधिहरूद्वारा हस्ताक्षर गरी जारी गरिएको हो।