कपिलवस्तु, असार १९ गतेकपिलवस्तु — आर्थिक वर्षको अन्तिम महिना असार सुरु भएसँगै मायादेवी गाउँपालिका तथा विभिन्न वडा कार्यालयहरूले सभा, शिक्षक सिकाइ कार्यक्रम, ‘वडाअध्यक्षसँग विद्यार्थी’, ‘वडाअध्यक्षसँग किसान’ लगायतका विभिन्न कार्यक्रम धमाधम सञ्चालन गर्न थालेका छन्।

स्थानीयवासीहरूले भने यस्ता कार्यक्रम आर्थिक वर्षको अन्त्यतिर मात्र किन केन्द्रित गरिन्छन् भन्ने प्रश्न उठाउन थालेका छन्। उनीहरूको जिज्ञासा छ— यी कार्यक्रम फागुन, चैत वा वैशाख महिनामै सञ्चालन गर्न नसकिने थियो कि ? वा आर्थिक वर्ष सकिनुअघि विनियोजित बजेट खर्च गर्नुपर्ने दबाबका कारण हतारहतार कार्यक्रम आयोजना गरिएको हो स्थानीय सरोकारवालाहरूका अनुसार कार्यक्रमको संख्या बढाउँदैमा विकास भएको मान्न सकिँदैन।

यस्ता कार्यक्रमबाट किसान, विद्यार्थी तथा सर्वसाधारणले कति वास्तविक लाभ पाए भन्ने विषय महत्वपूर्ण हुने उनीहरूको भनाइ छ।उनीहरूले कार्यक्रमको प्रभावकारिता, उपलब्धि, लाभग्राहीको संख्या तथा खर्च विवरण सार्वजनिक गर्न माग गरेका छन्। “जनताको करबाट सञ्चालित कार्यक्रमको प्रत्येक रुपैयाँको हिसाब जनताले जान्न पाउनुपर्छ,” एक स्थानीयले बताए।

स्थानीयवासीहरूले मायादेवी गाउँपालिका तथा सबै वडा कार्यालयलाई कार्यक्रमको उद्देश्य, खर्च, उपलब्धि र लाभग्राहीसम्बन्धी विस्तृत विवरण सार्वजनिक गर्न आग्रह गरेका छन्। अन्यथा, आर्थिक वर्षको अन्त्यमा बजेट सक्ने उद्देश्यले मात्र यस्ता कार्यक्रम सञ्चालन गरिएको हो भन्ने जनआशंका थप बलियो बन्न सक्ने उनीहरूको भनाइ छ।

यस विषयमा गाउँपालिका तथा सम्बन्धित वडा कार्यालयहरूको आधिकारिक प्रतिक्रिया भने प्राप्त हुन सकेको छैन।