कपिलवस्तु असोज २१ गते ।कपिलवस्तु जिल्लाको तौलिहवास्थित बालमन्दिरको सभाहलमा ‘महाकाल युवा शक्ति’को दोस्रो स्थापना दिवस भव्य कार्यक्रमबीच सम्पन्न भएको छ।कार्यक्रमको उद्घाटन दीप प्रज्वलन गरी गरिएको थियो।

राष्ट्रिय गानसँगै हनुमान चालिसाको पाठ गर्दै कार्यक्रमलाई औपचारिक रूपमा अघि बढाइएको थियो।संस्थाका नेता तथा कार्यकर्ताको बाक्लो उपस्थितिमा सम्पन्न कार्यक्रममा हिन्दु धर्मको संरक्षण तथा समाजमा बढ्दै गएको विकृति र विसंगति न्यूनीकरणका विषयमा गम्भीर छलफल गरिएको थियो।

विभिन्न धर्मगुरुहरूले सहभागीलाई धार्मिक ज्ञान तथा उपदेशसमेत दिएका थिए। वक्ताहरूले धर्म, संस्कृति र राष्ट्रियताको रक्षाका लागि युवाहरू एकजुट हुनुपर्नेमा जोड दिएका थिए।कार्यक्रममा राष्ट्रिय एकता दलका केन्द्रीय अध्यक्ष विनय यादव प्रमुख अतिथिका रूपमा उपस्थित थिए।

विशेष अतिथिका रूपमा लुम्बिनी प्रदेशसभा सदस्य मधुसुदन शरण चौधरी, पूर्वमन्त्री दानबहादुर चौधरी, शुद्धोधन गाउँपालिकाका अध्यक्ष कमलेश शरण चौधरी तथा रवि दत्त मिश्रको उल्लेखनीय सहभागिता रहेको थियो।त्यस्तै साध्वी गंगेसा र रजनीकान्त चौधरीलगायतको पनि उपस्थिति रहेको थियो।

महाकाल युवा शक्तिका अध्यक्ष धर्मराज विश्वकर्माको अध्यक्षतामा सम्पन्न कार्यक्रमको सञ्चालन राजेश सोनीले गरेका थिए।