कपिलबस्तु–क्षेत्र नं. १ मा स्वतन्त्र उम्मेदवार आशिष शर्माले चुनावी घरदैलो अभियानलाई तीव्र बनाएका छन्। चुनाव नजिकिँदै जाँदा उनी बिहानदेखि साँझसम्म टोल–टोल र बस्ती–बस्ती पुगेर मतदातासँग प्रत्यक्ष भेटघाट गरिरहेका छन्।

स्थानीय नागरिकसँग खुला संवाद गर्दै उनले जनताका दैनिक समस्या सुन्ने र समाधानका उपाय प्रस्तुत गर्ने प्रयास गरिरहेका छन्।घरदैलोका क्रममा शर्माले शिक्षा, स्वास्थ्य र रोजगारीलाई आफ्नो मुख्य एजेन्डा बनाएका छन्। शिक्षामा गुणस्तर सुधार, सरकारी विद्यालयको स्तरोन्नति, प्राविधिक तथा सीपमूलक शिक्षामा जोड दिने उनको प्रतिबद्धता छ।

त्यसैगरी, स्वास्थ्य सेवामा सहज पहुँच, आधारभूत स्वास्थ्य केन्द्र सुदृढीकरण र गरिब तथा विपन्न नागरिकलाई निःशुल्क उपचारको व्यवस्था गर्ने योजना रहेको उनले बताएका छन्।युवालाई लक्षित गर्दै शर्माले स्थानीय स्तरमै रोजगारी सिर्जना गर्न कृषि, साना उद्योग र उद्यमशीलता प्रवर्द्धन गर्ने बताए।

किसानका समस्या, मल–बिउको उपलब्धता, उत्पादनको उचित मूल्य र बजार व्यवस्थापनमा राज्यको भूमिका बलियो हुनुपर्ने उनको भनाइ छ।घरदैलो अभियानमा स्थानीयले देखाएका समस्या र सुझावलाई नीतिगत प्राथमिकतामा राख्ने प्रतिबद्धता जनाउँदै शर्माले जनमुखी विकास, पारदर्शिता र सुशासनमार्फत कपिलबस्तु–१ लाई समृद्ध बनाउने दाबी गरेका छन्।

स्वतन्त्र उम्मेदवारको रूपमा जनताको विश्वास र समर्थन नै आफ्नो मुख्य शक्ति भएको उनले बताए।