मायादेवी गाउँपालिका–७ स्थित हरनामपुर प्राथमिक स्वास्थ्य केन्द्रमा विभिन्न गम्भीर समस्या देखिएको छ। स्थानीय अनुगमनका क्रममा स्वास्थ्य सेवामा लापरवाही र आधारभूत सुविधा अभाव भेटिएको भन्दै तत्काल सुधारको माग गरिएको छ।

अनुगमनकर्ता अनुप चौधरीका अनुसार २०८२ मंसिर २४ गते गरिएको निरीक्षणमा स्वास्थ्य केन्द्रमा करिब पाँच महिनादेखि एम्बुलेन्स सेवा सञ्चालनमा नरहेको पाइएको छ।

एम्बुलेन्स मर्मतका लागि पठाइएको भए पनि लामो समयसम्म सेवा पुनः सुरु नभएकोले बिरामीहरूलाई समस्या भइरहेको छ।अनुगमनका क्रममा औषधिको अभाव, प्रयोगशाला (ल्याब) सेवाको कमजोर अवस्था डाक्टरको अभाव समेत देखिएको छ।

यस्ता आधारभूत सेवाहरू नहुँदा स्वास्थ्य केन्द्रले प्रभावकारी सेवा दिन नसकेको स्थानीयको गुनासो छ।करिब १८ करोड रुपैयाँ खर्चेर निर्माण गरिएको भवन भए पनि आवश्यक सेवा र व्यवस्थापनमा कमजोरी देखिएकोले सम्बन्धित निकायले तुरुन्त ध्यान दिनुपर्ने माग गरिएको छ।

स्थानीयवासी तथा अनुगमनकर्ताले एम्बुलेन्स सेवा तुरुन्त सञ्चालनमा ल्याउन, आवश्यक औषधि उपलब्ध गराउन र दक्ष स्वास्थ्यकर्मीको व्यवस्था गर्न सम्बन्धित निकायसँग आग्रह गरेका छन्।समुदाय युवा समाज कपिलवस्तु क्लबका अध्यक्ष अनुप चौधरीले यस विषयमा जानकारी दिनुभएको हो।