कपिलवस्तु, वैशाख २ — कपिलवस्तुको शिवराज नगरपालिका–चन्द्रौटाबाट सुनका गहना चोरी गरेको आरोपमा दुई जना पाकिस्तानी महिला पक्राउ परेका छन्।

वडा प्रहरी कार्यालय चन्द्रौटाको टोलीले उनीहरूलाई नियन्त्रणमा लिएको प्रहरी नायब उपरीक्षक रिपेन्द्रकुमार सिंहले जानकारी दिनुभयो।पक्राउ पर्नेमा २० वर्षीया विवि कलसुम र ४१ वर्षीया सहबाना रहेका छन्।

उनीहरूको साथबाट पाकिस्तानी पासपोर्टसमेत बरामद गरिएको प्रहरीले जनाएको छ।प्रहरीका अनुसार चैत ३० गते साँझ करिब ५:३० बजे सामान्य ग्राहकको रूपमा सुन पसलमा प्रवेश गरेका उनीहरूले सुन किन्ने बहानामा गहना चोरी गरेका थिए।

चोरीपछि पसलबाट बाहिर निस्कँदा मास्कमाथि बुर्का लगाएर पहिचान लुकाउने प्रयास गरेको पनि खुलेको छ।प्रारम्भिक अनुसन्धानबाट उनीहरूले रुपन्देहीको योगीकुटी, कपिलवस्तुको तौलिहवा र चन्द्रौटामा गरी तीन स्थानमा चोरी गरेको खुलासा भएको छ।

उनीहरूले नगद देखाउने तथा गहना हेर्ने बहानामा चोरी गर्ने शैली अपनाएको पाइएको प्रहरीले जनाएको छ।हाल उनीहरूविरुद्ध चोरी तथा ठगीसम्बन्धी मुद्दामा थप अनुसन्धान भइरहेको वडा प्रहरी कार्यालय चन्द्रौटाले जनाएको छ।