कपिलवस्तुको शिवराज नगरपालिका–५ चन्द्रौटामा रहेको आधारभूत अस्पतालमा करिब ३८ लाख रुपैयाँ बराबरको आर्थिक अनियमितता भएको गम्भीर आशंका सार्वजनिक भएको छ।

गत आर्थिक वर्ष २०८१/८२ को लेखापरीक्षणका क्रममा अस्पतालका अभिलेखमा १२८ वटा भौचरमार्फत बैंक खातामा रकम जम्मा गरिएको देखिए पनि वास्तविक बैंक विवरणमा भने उक्त रकम नदेखिएपछि प्रकरण बाहिर आएको हो।प्रारम्भिक अनुसन्धानले भौचर र बैंक विवरणबीच ठूलो असमानता देखाएको छ।

अझ चकित पार्ने तथ्य के भने, सम्बन्धित बैंकले ती भौचरमा प्रयोग गरिएको छाप नै ‘नक्कली’ भएको संकेत गरेको स्रोतले जनाएको छ। यसले योजनाबद्ध रूपमा रकम हिनामिना गरिएको आशंकालाई थप बल दिएको छ।

यस विषयमा नगर प्रमुख अजय थापाको हस्ताक्षरमा बैसाख ४ गते वडा प्रहरी कार्यालय चन्द्रौटालाई छानबिन गरी दोषीमाथि कडा कारबाही गर्न निर्देशन दिइएको छ।

नगरपालिकाले घटनालाई अत्यन्त गम्भीर रूपमा लिँदै छिटोभन्दा छिटो अनुसन्धान प्रक्रिया अघि बढाउन आग्रह गरेको छ।उता अस्पताल व्यवस्थापन समितिका अध्यक्ष नेत्र बेल्वासेले उक्त रकम बैंक विवरणमा किन नदेखिएको हो भन्ने विषयमा स्पष्ट पार्न बैंकलाई औपचारिक पत्र पठाइएको जानकारी दिएका छन्।

बैंकबाट जवाफ आएपछि थप अनुसन्धान अघि बढाइने उनले बताए।स्थानीय स्तरमा भने बैंकका कर्मचारी र अस्पतालका कर्मचारीबीच मिलेमतोमा रकम हिनामिना भएको आशंका व्यक्त गरिएको छ।

यस घटनाले स्वास्थ्य संस्थाको आर्थिक पारदर्शिता र विश्वसनीयतामाथि गम्भीर प्रश्न खडा गरेको छ। अबको छानबिनले वास्तविकता उजागर गर्दै दोषीलाई कानुनी दायरामा ल्याउने अपेक्षा गरिएको छ।