कपिलवस्तु, जेठ ३ गते ।कपिलवस्तुको मायादेवी गाउँपालिका–१, सेमरौटीस्थित श्री सरस्वती आधारभूत विद्यालय ले विद्यालयको अतिक्रमित जग्गा खाली गर्न सात दिने सूचना जारी गरेको छ।

विद्यालय प्रशासनले सार्वजनिक सूचना प्रकाशित गर्दै विद्यालयको स्वामित्वमा रहेको जग्गामा बनाइएका घरटहरा हटाउन निर्देशन दिएको हो।विद्यालयका प्रधानाध्यापक प्रभु यादव का अनुसार साविक पकडी गाविस–६ क अन्तर्गत कित्ता नं. ३५० को १–११–१५ क्षेत्रफल जग्गा अतिक्रमण गरिएको पाइएको छ।

सो जग्गामा निर्माण गरिएका घरटहरा सात दिनभित्र खाली गर्न सम्बन्धित पक्षलाई आग्रह गरिएको छ।विद्यालयले जारी गरेको सूचनामा मायादेवी गाउँपालिका, गृह मन्त्रालय, संघीय मामिला तथा सामान्य प्रशासन मन्त्रालयबाट प्राप्त कागजात तथा स्थानीय सरकार सञ्चालन ऐन, २०७४ मा रहेको स्थानीय तहको सम्पत्ति संरक्षण सम्बन्धी व्यवस्थाअनुसार कदम चालिएको उल्लेख गरिएको छ।

विद्यालय प्रशासनले सार्वजनिक सम्पत्तिको संरक्षण सबैको साझा दायित्व भएको भन्दै स्थानीयवासी, अभिभावक तथा सरोकारवाला निकायलाई सहयोग गर्न अनुरोध गरेको छ।प्रधानाध्यापक यादवले तोकिएको समयभित्र अतिक्रमित संरचना खाली नगरेमा प्रचलित कानुनअनुसार विद्यालय आफैंले जग्गा खाली गराउने र त्यस क्रममा लाग्ने सम्पूर्ण खर्च सम्बन्धित पक्षबाट असुल गरिने चेतावनी दिनुभयो।