कपिलवस्तु, जेठ १८ गते:- कृष्णनगर उद्योग वाणिज्य संघले कृष्णनगर नगरपालिकास्थित एक होटलमा अनैतिक गतिविधि सञ्चालन भइरहेको आरोप लगाउँदै संलग्न होटल व्यवसायी तथा अन्य व्यक्तिमाथि कानुनबमोजिम कारबाही गर्न माग गरेको छ।

संघले जारी गरेको प्रेस विज्ञप्तिअनुसार कृष्णनगर–७ स्थित एक होटलमा शंकास्पद गतिविधि भइरहेको सूचनाका आधारमा संघका अध्यक्ष रितेश शर्माको नेतृत्वमा गएको टोलीले अनुगमन तथा निरीक्षण गरेको थियो।

अनुगमनका क्रममा आपत्तिजनक सामग्री फेला परेको तथा होटलमा अनैतिक गतिविधि भइरहेको देखिएको विज्ञप्तिमा उल्लेख गरिएको छ।संघका अनुसार यस्ता गतिविधिले समाजमा नकारात्मक सन्देश प्रवाह गर्नुका साथै पर्यटन, व्यापार र होटल व्यवसायको छविमा समेत असर पुर्‍याउने भएकाले दोषीमाथि कडा कानुनी कारबाही आवश्यक छ।

उद्योग वाणिज्य संघले स्थानीय प्रशासन र सुरक्षा निकायलाई घटनाको निष्पक्ष अनुसन्धान गरी संलग्न व्यक्तिहरूमाथि आवश्यक कारबाही गर्न आग्रह गरेको छ। साथै होटल व्यवसायीहरूलाई आफ्नो व्यवसाय कानुनसम्मत, पारदर्शी र मर्यादित ढंगले सञ्चालन गर्न पनि अपिल गरेको छ।संघद्वारा जारी प्रेस विज्ञप्तिमा यस्ता गैरकानुनी तथा सामाजिक विकृति फैलाउने गतिविधि नियन्त्रणका लागि प्रशासनसँग सहकार्य जारी रहने उल्लेख गरिएको छ।