कपिलवस्तु, असार ३१ गतेकपिलवस्तु नगरपालिकाको २०औँ नगरसभा अधिवेशनको दोस्रो बैठक बुधबार नगर प्रमुख सुदीप पौडेलको अध्यक्षतामा सम्पन्न भएको छ।

नगर उपप्रमुख सुनिता गुप्ता, प्रमुख प्रशासकीय अधिकृत विनय कुमार श्रीवास्तव, वडा अध्यक्षहरू, कार्यपालिका सदस्यहरू, कर्मचारी, सञ्चारकर्मी तथा विभिन्न क्षेत्रका सरोकारवालाहरूको उपस्थितिमा नगरसभा सम्पन्न भएको हो।

समृद्ध नगर, खुसी नगरबासी भन्ने मूल नारालाई आत्मसात गर्दै नगरसभाले आगामी आर्थिक वर्ष २०८३/८४ का लागि कुल १ अर्ब ३२ करोड ६६ लाख ३४ हजार रुपैयाँको बजेट पारित गरेको छ।

नगर प्रमुख सुदीप पौडेलले बजेट प्रस्तुत गर्दै नगरको समग्र विकास, गुणस्तरीय स्वास्थ्य सेवा, शिक्षा, कृषि, रोजगार, पूर्वाधार निर्माण तथा उज्यालो सहर अभियानलाई प्राथमिकतामा राखिएको जानकारी दिनुभयो।

उहाँले नगरवासीको जीवनस्तर उकास्ने, सुशासन प्रवर्द्धन गर्ने र दिगो विकासका लक्ष्य हासिल गर्ने उद्देश्यसहित बजेट विनियोजन गरिएको बताउनुभयो।नगरसभामा आगामी वर्षका नीति तथा कार्यक्रममाथि विस्तृत छलफल भएको थियो। नगरको आर्थिक सामाजिक तथा भौतिक विकासलाई गति दिने योजनाहरूलाई विशेष प्राथमिकता दिँदै बजेट पारित गरिएको जनाइएको छ।

नगरपालिकाले आगामी आर्थिक वर्षमा विकास निर्माण सेवा प्रवाहको प्रभावकारिता, सामाजिक सुरक्षा, स्वास्थ्य तथा शिक्षा क्षेत्रको सुधारमार्फत नागरिकमैत्री र समृद्ध कपिलवस्तु निर्माणको लक्ष्य लिएको जनाएको छ।