कपिलवस्तु भदौ ३१ गते ।बालविवाहविरुद्ध विद्यार्थीलाई सचेत बनाउँदै मायादेवी गाउँपालिका ७ रतनपुरस्थित श्री स्वतन्त्र माध्यमिक विद्यालयमा अन्तरक्रिया कार्यक्रम गरिएको छ।

कार्यक्रममा बालविवाहले बालबालिकाको शिक्षा स्वास्थ्य मानसिक विकास र भविष्यमा पार्ने असरबारे विद्यार्थीहरूसँग गम्भीर छलफल गरिएको हो।दलित सामाजिक विकास केन्द्र (DSDC) र युनाइटेड मिशन टु नेपाल (UMN) को साझेदारीमा सञ्चालित परिवर्तनका लागि बालबालिका युवा र समुदाय (CYCC) परियोजनाको आर्थिक सहयोग तथा समुदाय युवा समाज कपिलवस्तुको आयोजनामा बुधबार कक्षा १०, ११ र १२ का विद्यार्थी सहभागी भएका थिए।

कार्यक्रममा बालविवाह किन हुन्छ यसको पछाडि परिवार र समुदायको भूमिका कस्तो हुन्छ तथा बालविवाह रोक्न विद्यार्थी र युवाले के गर्न सक्छन् भन्ने विषयमा अन्तरक्रिया गरिएको थियो। विद्यार्थीहरूले पनि बालविवाहसँग जोडिएका सामाजिक दबाब अभिभावकको भूमिका र रोकथामका व्यावहारिक उपायबारे प्रश्न राखेका थिए।

प्रहरी चौकी तुलसीपुर बलुहवाका प्रहरी हवल्दार खेमबहादुर परियारले बालविवाह सामाजिक समस्या मात्र नभई कानुनसँग जोडिएको विषय भएकाले यसको रोकथाममा सबै पक्ष जिम्मेवार हुनुपर्ने बताए। जोखिम वा दबाबको अवस्था आएमा सम्बन्धित निकायमा जानकारी गराउन उनले विद्यार्थीलाई आग्रह गरे।प्रधानाध्यापक अहमद गुलामले विद्यालयमा दिइने समयमैको सचेतनाले विद्यार्थीलाई आफ्नै भविष्यबारे सही निर्णय लिन सक्षम बनाउने बताए।

समुदाय युवा समाज कपिलवस्तुका अध्यक्ष अनुप चौधरीले बालविवाह अन्त्यका लागि युवाको सक्रिय सहभागिता अपरिहार्य रहेको बताए।कार्यक्रमको सहजीकरण CYCC परियोजनाका युवा संलग्नता सहायक अधिकृत परशुराम निगमले गरेका थिए भने सञ्चालनCYCC सामाजिक परिचालक बबलु यादवले गरेका थिए।