कपिलवस्तु जिल्लाको सुद्धोधन गाउँपालिका–३ मा शुक्रबार दिउँसो दुई मोटरसाइकल आपसमा ठोक्किँदा एक प्रहरी सहायक हवल्दारको मृत्यु भएको छ भने अर्को व्यक्ति गम्भीर घाइते भएका छन्।

गाउँपालिका कार्यालय नजिकै लु ८३ प ७६९२ नम्बरको मोटरसाइकल र अर्को मोटरसाइकल एक–आपसमा ठोक्किँदा दुर्घटना भएको हो।इलाका प्रहरी कार्यालय पकडीका अनुसार, सो मोटरसाइकलका चालक प्रहरी सहायक हवल्दार राम बेलास यादवको घटनास्थलमै मृत्यु भएको हो।

इलाका प्रहरी कार्यालय कोपवा, कपिलवस्तुमा कार्यरत यादव बिदा सकाएर कार्यालयतर्फ जाँदै गर्दा दुर्घटना भएको प्रहरीले जनाएको छ।मृतक यादवको घर रोहिणी गाउँपालिका–टिकरमा रहेको बुझिएको छ। सो दुर्घटनामा गम्भीर घाइते भएका अर्का व्यक्तिलाई उपचारका लागि भैरहवा मेडिकल कलेज पठाइएको छ।

दुर्घटनामा संलग्न अर्को मोटरसाइकल भने घटनास्थलबाट फरार भएको र हालसम्म पत्ता नलागेको प्रहरीले जनाएको छ। घटनाबारे थप अनुसन्धान भइरहेको प्रहरीले जानकारी दिएको छ।