कपिलवस्तु । कपिलवस्तु जिल्लाका दुई छुट्टाछुट्टै स्थानमा भएका सवारी दुर्घटनामा एक बालिका र एक पुरुषको मृत्यु भएको छ।कपिलवस्तु नगरपालिका–९, जगदीशपुरस्थित जर्लैया जाने चोक नजिकै लु २ ख ६४५५ नम्बरको टिप्परको ठक्करबाट ९ वर्षीया छात्रा आशिका खत्रीको मृत्यु भएको हो।

उनी परीक्षा दिएर घर फर्कने क्रममा दुर्घटनामा परेकी थिइन्। जगदीशपुर निवासी खत्री गुरुकुल बोर्डिङ स्कुलमा कक्षा ३ मा अध्ययनरत थिइन्।गम्भीर घाइते भएकी खत्रीलाई उपचारका लागि भैरहवा मेडिकल कलेज लगिएकोमा उपचारकै क्रममा मृत्यु भएको प्रहरीले जनाएको छ।

बालुवा लोड गरेर गइरहेको टिप्परले ठक्कर दिएको बताइएको छ।दुर्घटनापछि आक्रोशित स्थानीयवासी तथा आफन्तहरूले विरोध प्रदर्शन गर्दै सडक अवरुद्ध गरेका थिए।

प्रहरीले टिप्पर र चालकलाई नियन्त्रणमा लिएको जनाएको छ।यस्तै, कपिलवस्तुको कृष्णनगर नगरपालिका–१, सालीमा हलचोक नजिक बिहीबार करिब ११ बजेतिर बसको ठक्करबाट एक साइकल यात्रीको मृत्यु भएको छ।

चन्द्रौटाबाट कृष्णनगरतर्फ जाँदै गरेको रा १ ख २१४२ नम्बरको बसले ठक्कर दिँदा बुद्धभूमि नगरपालिका–१० का डिल्लीराम थारु गम्भीर घाइते भएका थिए।घाइते थारुलाई उपचारका लागि बहादुरगञ्ज अस्पताल लगिएको थियो।

त्यहाँबाट थप उपचारका लागि बुटवलस्थित प्रादेशिक अस्पताल पठाइएकोमा करिब दिउँसो २ बजे उनको मृत्यु भएको प्रहरीले जनाएको छ।दुर्घटनामा संलग्न बस र चालकलाई पनि प्रहरीले नियन्त्रणमा लिएको छ।