कपिलवस्तु, चैत २१ गते।कपिलवस्तु नगरपालिका वडा नं. ८ स्थित दोहनी शिव मन्दिर प्रांगणमा आजदेखि नौ दिवसीय लक्ष्मी नारायण महायज्ञ, संगीतमय कथा तथा भव्य रामलीला कार्यक्रम सुरु भएको छ।

धार्मिक, सांस्कृतिक तथा सामाजिक समृद्धिलाई लक्षित गरी आयोजना गरिएको यस महायज्ञको शुभारम्भ भव्य कलश शोभा यात्रासहित गरिएको हो। आयोजक समितिका अनुसार महायज्ञ चैत २१ गतेदेखि सुरु भई चैत २९ गते पूर्णाहुति गरिनेछ।

कार्यक्रममा भारतबाट आमन्त्रित धार्मिक व्यक्तित्वहरू श्रीमती नीलम दीक्षित ‘मानस मधुरी’ (कानपुर), श्री पंकज पाण्डेय (श्री मणिराम छावनी, अयोध्या) तथा आचार्य पंकज हरगोविन्द दीक्षित (कानपुर) को विशेष सहभागिता रहेको छ।

सम्पूर्ण क्षेत्रवासीको सक्रियतामा सञ्चालन भइरहेको यस कार्यक्रमको आयोजक समितिमा अध्यक्ष शत्रुधन चौधरी, संरक्षक उपेन्द्र पाण्डेय, उपाध्यक्ष जयराम तेली, कोषाध्यक्ष पुरुषोत्तम गिरी, सचिव सन्तोष गुप्ता तथा सदस्यहरूमा ब्रह्मचारी गौड, रिकुन पाण्डेय र सग्रीव गुप्ता रहेका छन्।

समितिका अध्यक्ष शत्रुधन चौधरीले धार्मिक कार्यक्रममार्फत समाजमा धार्मिक चेतना र सामाजिक एकता अभिवृद्धि गर्ने उद्देश्य रहेको बताउँदै यस्तो आयोजनाले युवा पुस्तालाई संस्कृति र संस्कारप्रति आकर्षित गर्न महत्वपूर्ण भूमिका खेल्ने विश्वास व्यक्त गरे। उनले सम्पूर्ण श्रद्धालुहरूलाई कार्यक्रममा सहभागी भई पुण्य लाभ लिन आग्रह समेत गरे।

आयोजकका अनुसार महायज्ञ अवधिभर दैनिक रूपमा संगीतमय कथा, रामलीला तथा विभिन्न आध्यात्मिक कार्यक्रमहरू सञ्चालन गरिनेछन्। यसले स्थानीय समुदायमा धार्मिक तथा सांस्कृतिक जागरण फैलाउने अपेक्षा गरिएको छ।