कपिलवस्तु — कपिलवस्तुको महाराजगंज नगरपालिका–स्थित वरगदा घटनामा सुरक्षाकर्मीको गोली लागेर घाइते भएका एक युवकको मृत्यु भएको छ।महाराजगंज नगरपालिका भुटहनियाका २२ वर्षीय जितेन्द्र (अरुण)यादवको उपचारका क्रममा आज बिहान चितवन मेडिकल कलेजमा मृत्यु भएको हो।

गत चैत्र ७ गते महाराजगंजको वरगदा गाउँमा हिन्दु–मुस्लिम समुदायबीच भएको झडपपछि स्थिति तनावग्रस्त बनेको थियो। सो क्रममा भड्किएको भीड नियन्त्रण गर्न सुरक्षाकर्मी परिचालन गरिएको थियो।

भीड नियन्त्रणका क्रममा स्थानीय युवा र सुरक्षाकर्मीबीच झडप हुँदा गोली चलेको थियो, जसमा यादव गम्भीर घाइते भएका थिए। उनको पेटमा गोली लागेको थियो।

घटनापछि उनलाई तत्काल उपचारका लागि चितवन मेडिकल कलेज लगिएको थियो। तर उपचारकै क्रममा आज बिहान उनको निधन भएको हो।