तौलिहवा (कपिलवस्तु), चैत २३ गते — कपिलवस्तुमा ड्युटीमा खटिएका सशस्त्र प्रहरीमाथि हातपात गरेको आरोपमा शुद्धोधन गाउँपालिकाका उपाध्यक्ष होम प्रकाश चौधरीलाई प्रहरीले नियन्त्रणमा लिएको छ।

जिल्ला प्रहरी कार्यालय कपिलवस्तुका प्रहरी उपरीक्षक सन्तोष आचार्यका अनुसार शुद्धोधन गाउँपालिकाको वडा नम्बर ५ स्थित शिवलवा दोहनी चेकपोष्टमा ड्युटी गरिरहेका सशस्त्र प्रहरीका वरिष्ठ हवल्दार भीमबहादुर चौधरीमाथि हातपात भएपछि उनलाई नियन्त्रणमा लिइएको हो।

प्रहरीका अनुसार सामान ओसारपसार गर्ने विषयलाई लिएर सुरु भएको विवाद बढ्दै जाँदा उपाध्यक्ष चौधरीले ड्युटीमा रहेका सशस्त्र प्रहरीमाथि कुटपिट गरेका थिए।

घटनापछि प्रहरीले उपाध्यक्ष चौधरीलाई नियन्त्रणमा लिएर थप अनुसन्धान अघि बढाएको जनाएको छ।