१५ दिनभित्र सार्वजनिक जग्गा खाली गर्न निर्देशन शुद्धोधन गाउँपालिकाकपिलवस्तु, बैशाख २४ — कपिलवस्तुको शुद्धोधन गाउँपालिकाले आफ्नो क्षेत्रभित्र अतिक्रमण गरिएका सरकारी तथा सार्वजनिक जग्गा १५ दिनभित्र खाली गर्न निर्देशन दिएको छ। गाउँपालिकाले सार्वजनिक सूचना जारी गर्दै व्यक्तिगत प्रयोगमा ल्याइएका सम्पूर्ण सार्वजनिक सम्पत्ति तत्काल खाली गर्न आग्रह गरेको हो।

गाउँ कार्यपालिकाको कार्यालय, लवनीबाट जारी सूचनामा नेपाल सरकार गृह मन्त्रालय तथा संघीय मामिला तथा सामान्य प्रशासन मन्त्रालयको निर्देशनअनुसार सार्वजनिक जग्गा संरक्षणसम्बन्धी व्यवस्था कार्यान्वयनमा ल्याइएको उल्लेख गरिएको छ।

सोही व्यवस्थाअनुसार गाउँपालिका क्षेत्रभित्र अतिक्रमण गरी बनाइएका घर, बाटो, कुलो, पोखरी लगायतका संरचना हटाउने अभियान सञ्चालन गरिने जनाइएको छ।सूचनामा भनिएको छ,

“सार्वजनिक जग्गा अतिक्रमण गरी घरटहरा निर्माण, खेतीपाती वा अन्य प्रयोजनमा प्रयोग गरिएको पाइएमा १५ दिनभित्र स्वेच्छिक रूपमा हटाउन सम्बन्धित सबैलाई जानकारी गराइन्छ।”तोकिएको समयसीमाभित्र अतिक्रमण हटाउन अटेर गरेमा गाउँपालिकाले प्रचलित कानुनअनुसार बलपूर्वक खाली गराउने र त्यसबाट लाग्ने सम्पूर्ण खर्च सम्बन्धित व्यक्तिबाट असुल गरिने चेतावनी समेत दिइएको छ।

गाउँपालिका अध्यक्ष कमलेश शरण चौधरीद्वारा हस्ताक्षरित सूचनामा सार्वजनिक सम्पत्तिको संरक्षणमा सबै नागरिकको सहकार्य आवश्यक रहेको उल्लेख गर्दै अतिक्रमण सम्बन्धी जानकारी भए वडा कार्यालय वा गाउँपालिकामा खबर गर्न आग्रह गरिएको छ।

स्थानीय तहले सार्वजनिक सम्पत्तिको संरक्षणमा सक्रियता बढाएसँगै शुद्धोधन क्षेत्रमा अतिक्रमण विरुद्धको अभियान थप कडाइका साथ अगाडि बढ्ने संकेत देखिएको छ।