कपिलवस्तु, बैशाख २६ — कपिलवस्तुको शिवराज नगरपालिकाअन्तर्गत आधारभूत स्वास्थ्य सेवा अस्पताल चन्द्रौटामा आर्थिक वर्ष २०८१/०८२ को कारोबारमा अनियमितता भएको आरोपमा अस्पताल तथा बैंकका ५ जना कर्मचारी पक्राउ परेका छन्।

जिल्ला प्रहरी कार्यालय कपिलवस्तुले जारी गरेको प्रेस विज्ञप्तिअनुसार अस्पतालको सेवा शुल्क तथा फार्मेसीबाट औषधि बिक्रीबापत संकलित रकम नेपाल बैंक लिमिटेड चन्द्रौटा शाखामा जम्मा हुनुपर्नेमा विभिन्न मितिका भौचरमार्फत करिब रु ३८ लाख ११ हजार ७ सय ७० रकम बैंकमा जम्मा नभएको प्रारम्भिक अनुसन्धानबाट खुलेको हो।

प्रहरीका अनुसार अनुसन्धानका क्रममा नक्कली बैंक भौचर बनाई संगठित रूपमा रकम हिनामिना गरिएको देखिएपछि वडा प्रहरी कार्यालय चन्द्रौटाले थप अनुसन्धान अघि बढाएको थियो।
प्रहरीले पक्राउ परेकामध्ये स्वास्थ्य शाखा प्रमुख, मेडिकल सुपरिटेन्डेन्ट, फार्मेसी सहायक तथा नेपाल बैंकका दुई कर्मचारी रहेका जनाएको छ। उनीहरूविरुद्ध ठगी तथा आपराधिक विश्वासघातसम्बन्धी कसुरमा अनुसन्धान भइरहेको जिल्ला प्रहरी कार्यालय कपिलवस्तुले जनाएको छ।