कपिलवस्तु, वैशाख ३० गते । दलित सामाजिक विकास केन्द्रको आयोजनामा. युनाइटेड मिसन टु नेपालको सहयोग“परिवर्तनका लागि बालबालिका, युवा र समुदाय परियोजना” प्रगतिशील युवा. समाजको समन्वय अन्तर्गत डल, कुसन तथा बुके बनाउने २४ दिने निःशुल्क सिपमूलक तालिम सम्पन्न भएको छ ।

मायादेवी गाउँपालिका–१ मा आयोजित तालिम समापन कार्यक्रममा वडा सदस्य कान्तिदेवी वर्माले सिकेको सीपलाई व्यवहारमा उतार्न सके मात्र तालिमको उद्देश्य सफल हुने बताउनुभयो ।

उहाँले सहभागीलाई सीपलाई आयआर्जनसँग जोड्न आग्रह गर्नुभयो ।परियोजना अधिकृत जितेन्द्र चौधरीको अध्यक्षतामा सम्पन्न कार्यक्रममा तालिमपछि व्यवसाय सञ्चालन गर्न चाहने सहभागीलाई आवश्यक सहयोग गरिने जानकारी दिइएको थियो ।

प्रशिक्षक गीता थापाले तालिमले किशोरीहरूलाई आत्मनिर्भर बन्न मद्दत पुग्ने विश्वास व्यक्त गर्दै आगामी दिनमा उनीहरूले प्रशिक्षक तथा परीक्षकको भूमिकासमेत निर्वाह गर्न सक्ने बताउनुभयो ।

सहभागी सुमन पत्थरकटले सिकेको सीपलाई भविष्यमा आयआर्जनको माध्यम बनाउने बताउनुभयो भने पुष्पलता दुबेले तालिमपछि आफ्नै व्यवसाय सञ्चालन गर्ने आत्मविश्वास बढेको प्रतिक्रिया दिनुभयो ।कार्यक्रममा प्रगतिशील युवा क्लबका सचिव बिन्देश्वरी यादवले सिकेको सीपलाई व्यवहारमा सदुपयोग गर्न आग्रह गर्नुभयो । तालिममा विभिन्न वडाका सात जना किशोरीहरूको सहभागिता रहेको थियो ।