admin
कपिलवस्तु :-चाकरचौडा, सीमा सुरक्षालाई थप सुदृढ बनाउन चाकरचौडा बोर्डर क्षेत्र भन्सार कार्यालय आसपासमा बिग्रिएका CCTV क्यामेरा मर्मत गरी पुनः सञ्चालनमा ल्याइएको छ।
लामो समयदेखि बन्द अवस्थामा रहेका क्यामेराहरू सशस्त्र प्रहरी बलको प्राविधिक टोलीले आवश्यक केवल तथा उपकरण मर्मत गरेपछि पुनः सक्रिय भएका हुन्।
मर्मत सम्पन्न भएसँगै अब सीमा क्षेत्रको निगरानी सशस्त्र प्रहरी बलको कार्यालयबाट प्रत्यक्ष रूपमा गरिने जनाइएको छ। यसले सीमा क्षेत्रमा हुने गतिविधिको नियमित अनुगमन गर्न सहज हुने विश्वास गरिएको छ।
स्थानीय प्रशासनका अनुसार CCTV प्रणाली पुनः सञ्चालनमा आएपछि सीमा क्षेत्रमा हुने अवैध गतिविधि नियन्त्रण, आवतजावतको निगरानी तथा सुरक्षा व्यवस्थापन अझ प्रभावकारी बन्ने अपेक्षा गरिएको छ।
साथै, आधुनिक प्रविधिको प्रयोगले सुरक्षाकर्मीलाई काम गर्न थप सहजता मिल्ने बताइएको छ।सुरक्षा निकायले आगामी दिनमा पनि सीमा क्षेत्रमा निगरानी प्रणालीलाई थप मजबुत बनाउँदै लैजाने जनाएको छ।
