कपिलबस्तु, जेठ ४ गतेकपिलवस्तु जिल्लामा धान रोपाइँको समय नजिकिँदै गर्दा किसानहरू धानको बिउ अभावको समस्याबाट पीडित बनेका छन्। किसानहरूको तर्फबाट समाजसेवी परमेश्वर पाठकले प्रमुख जिल्ला अधिकारी समक्ष ज्ञापनपत्र बुझाउँदै धानको बिउ सहज रूपमा उपलब्ध गराइदिन माग गरेका हुन्।

जिल्ला प्रशासन कार्यालय कपिलवस्तुलाई बुझाइएको ज्ञापनपत्रमा कपिलवस्तु जिल्लाका करिब ९५ प्रतिशत परिवार कृषि पेशामा निर्भर रहेको उल्लेख गरिएको छ। अहिले धान खेती गर्ने मुख्य समयमा किसानहरूले धानको बिउ नपाउँदा ठूलो समस्या झेल्नुपरेको जनाइएको छ।

ज्ञापनपत्रमा समयमा बिउ उपलब्ध नभए धान उत्पादनमा प्रत्यक्ष असर पर्ने र किसानहरूले आर्थिक तथा कृषि संकट सामना गर्नुपर्ने अवस्था आउने उल्लेख गरिएको छ। साथै, “नेपाल कृषि प्रधान देश भए पनि किसानले पटक–पटक यस्ता समस्या भोग्नुपरेको छ, तर सम्बन्धित निकायको ध्यान पुग्न सकेको छैन,” भन्ने गुनासो पनि गरिएको छ।

समाजसेवी परमेश्वर पाठकले किसानलाई सहज रूपमा धानको बिउ उपलब्ध गराउन प्रशासनले तत्काल आवश्यक पहल गर्नुपर्ने माग गरेका छन्। उनले सम्पूर्ण किसानको समस्यालाई गम्भीर रूपमा लिँदै शीघ्र समाधानका लागि सम्बन्धित निकाय सक्रिय हुनुपर्ने बताएका छन्।