कपिलवस्तु, जेठ ६ गतेकपिलवस्तुको तौलिहवास्थित कपिलवस्तु अस्पताल मा बुधबारदेखि हेमोडायलाइसिस सेवा औपचारिक रूपमा सञ्चालनमा आएको छ। लुम्बिनी प्रदेशका स्वास्थ्य मन्त्री खेमबहादुर सारु ले रिबन काटेर सेवाको शुभारम्भ गरेका हुन्।

सेवा शुभारम्भ कार्यक्रममा मन्त्री सारुले अस्पतालमा डायलाइसिस सेवा सुरु भएसँगै मिर्गौला रोगबाट पीडित बिरामीहरूलाई सहज उपचारको पहुँच प्राप्त हुने बताए।

उनले सरकारी अस्पतालहरूको सेवा गुणस्तरीय बनाउँदै आम नागरिकको विश्वास जित्नुपर्नेमा जोड दिए। साथै, लुम्बिनी प्रदेशका सरकारी अस्पतालहरूमा आधुनिक र नवीन स्वास्थ्य सेवाहरू विस्तार हुँदै गएको जानकारी दिए।कार्यक्रममा पूर्व प्रदेश मन्त्री तथा प्रदेश सभा सदस्य विष्णु पन्थी ले सेवा सञ्चालनले यस क्षेत्रका बिरामीहरूलाई प्रत्यक्ष लाभ पुग्ने विश्वास व्यक्त गर्दै सेवालाई प्रभावकारी रूपमा सञ्चालन गर्नुपर्ने बताए।

प्रदेश सभा सदस्य सुधाकर पाण्डेय ले पनि अस्पतालको सेवा स्तरमा उल्लेखनीय सुधार आएको भन्दै थप सहयोगको गर्नुपर्ने बताए।।प्रमुख जिल्ला अधिकारी जनार्दन गौतम ले अस्पतालमा सेवा–सुविधा निरन्तर थपिँदै गएको उल्लेख गर्दै अझ प्रभावकारी व्यवस्थापन आवश्यक रहेको बताए।अस्पतालका मेडिकल सुपरिन्टेन्डेन्ट किशोर बन्जाडे का अनुसार लामो प्रयासपछि हेमोडायलाइसिस सेवा सुरु गरिएको हो।

हाल पाँच वटा डायलाइसिस मेसिनमार्फत सेवा प्रदान भइरहेको छ भने २८ जना बिरामी सम्पर्कमा आएका छन्। दुई साताअघिदेखि दुई जना बिरामीको उपचार पनि सुरु भइसकेको उनले जानकारी दिए।

साथै, निकट भविष्यमा सेवा निःशुल्क बनाउने तयारी भइरहेको समेत बताए।२०२८ सालमा स्थापना भएको कपिलवस्तु अस्पतालमा हाल आईसीयू, विशेषज्ञ चिकित्सक, फार्मेसी तथा अत्याधुनिक ल्याबसहितका विभिन्न स्वास्थ्य सेवाहरू उपलब्ध छन्। हेमोडायलाइसिस सेवा थपिएसँगै अस्पतालको सेवा दायरा अझ विस्तार भएको छ।