कपिलवस्तु, जेठ १४ गते:-
कपिलवस्तु नगरपालिका वडा नम्बर ३ महिता चोकमा सशस्त्र प्रहरीको गाडीले टेम्पुलाई ठक्कर दिँदा एक ३ वर्षीय बालकको मृत्यु भएको छ।

बुधबार बिहान करिब ११ बजे सेमरीबाट तौलिहवा तर्फ जाँदै गरेको लु प्र ०१००१ ह ३६७२ नम्बरको टेम्पुलाई सशस्त्र प्रहरीको गाडीले ठक्कर दिएको प्रहरीले जनाएको छ। दुर्घटनामा कपिलवस्तु नगरपालिका वडा नम्बर ६ सेमरी निवासी अतिकूर रहमानका ३ वर्षीय छोरा महफुज मुसलमान गम्भीर घाइते भएका थिए। उनलाई उपचारका लागि बुटवलस्थित चौराहा अस्पताल लगिएकोमा उपचारकै क्रममा मृत्यु भएको प्रहरीले जनाएको छ

दुर्घटनामा टेम्पु चालक कपिलवस्तु नगरपालिका वडा नम्बर ३ वर्गदवा निवासी ६० वर्षीय शिवप्रसाद चौधरी गम्भीर घाइते भएका छन्। उनको भैरहवास्थित मेडिकल कलेजमा उपचार भइरहेको छ।दुर्घटनामा घाइते भएका अन्य ८ जनालाई सामान्य उपचारपछि घर पठाइएको छ।

दुर्घटनापछि ठक्कर दिने सशस्त्र प्रहरीको गाडी र चालकलाई हालसम्म नियन्त्रणमा नलिइएको भन्दै पीडित परिवारले गुनासो गरेका छन्। मृतक बालकको शव हाल कपिलवस्तु अस्पतालमा राखिएको छ।