कपिलवस्तु, भदौ २२ गते ।रसुवाको भोटेकोशी नदीमा आएको भीषण बाढीबाट ज्यान गुमाएका नागरिकप्रति सम्मान तथा शोक व्यक्त गर्दै सरकारले घोषणा गरेको राष्ट्रिय शोक दिवसका अवसरमा कपिलवस्तुको मायादेवी गाउँपालिकाले राष्ट्रिय झण्डा आधा झुकाएको छ।

सरकारको निर्णयअनुसार भदौ २२ गते देशभर राष्ट्रिय शोक दिवस मनाइएको हो। सोही अवसरमा मायादेवी गाउँपालिकाको कार्यालय परिसरमा गाउँपालिका अध्यक्ष वलिउद्धिन खानको उपस्थितिमा राष्ट्रिय झण्डा आधा झुकाइएको थियो।

कार्यक्रममा प्रमुख प्रशासकीय अधिकृत नरेन्द्र यादव, योजना शाखाका रामकृष्ण तेली, इन्जिनियर मनोज चौधरी, सब–इन्जिनियर कौशल चौधरी, रोजगार शाखा प्रमुख सुरेन्द्र चौधरी, सूचना प्रविधि अधिकृत रामचन्द्र चौधरी, लेखा अधिकृत जटाशंकर पाण्डेयलगायत गाउँपालिकाका अधिकारी तथा कर्मचारीहरूको सहभागिता रहेको थियोगत भदौ १० गते रसुवाको भोटेकोशी नदी क्षेत्रमा आएको भीषण बाढीले ठूलो मानवीय तथा भौतिक क्षति पुर्‍याएको थियो।

बाढीपछि उद्धार, खोजी तथा राहत कार्यलाई तीव्रता दिइएको थियो।बाढीमा ज्यान गुमाएका नागरिकको सम्मानमा राष्ट्रिय शोक दिवस मनाउँदै देशभरका सरकारी कार्यालय मा राष्ट्रिय झण्डा आधा झुकाइएको हो।मायादेवी गाउँपालिकाले पनि सरकारको निर्णयलाई आत्मसात् गर्दै राष्ट्रिय झण्डा आधा झुकाएर विपद्मा ज्यान गुमाउनेहरूप्रति श्रद्धाञ्जली तथा शोकसन्तप्त परिवारप्रति ऐक्यबद्धता जनाएको छ।

राष्ट्रिय शोकका अवसरमा झण्डा आधा झुकाउनु विपद्मा ज्यान गुमाएका नागरिकप्रति राज्यको सम्मान र दुःखमा राष्ट्र एकसाथ उभिएको सन्देशका रूपमा लिइएको छ।