कपिलवस्तु, भदौ २४ गते । कपिलवस्तुको तौलिहवास्थित कालिका स्वावलम्बन सामाजिक केन्द्रले विपद्मा परेका नागरिकको राहत तथा उद्धारमा सहयोग पुर्‍याउने उद्देश्यले प्रधानमन्त्री दैवी प्रकोप उद्धार कोषमा १ लाख ५५ हजार रुपैयाँ सहयोग गरेको छ।

केन्द्रका अध्यक्ष मन्दिप सिंह, कार्यकारी निर्देशक रामेन्द्र सिंह रावललगायतको टोलीले सहयोग रकम जम्मा गरेको भौचर कपिलवस्तुका प्रमुख जिल्ला अधिकारी जनार्दन गौतमलाई हस्तान्तरण गरेको हो।

कार्यकारी निर्देशक रावलका अनुसार केन्द्रको साझेदारीमा फेयरमेड फाउन्डेसनअन्तर्गत सञ्चालित प्रेरणा परियोजनामार्फत यसअघि पनि २ लाख २५ हजार रुपैयाँ प्रधानमन्त्री दैवी प्रकोप उद्धार कोषमा सहयोग गरिएको थियो।भोटेकोशी क्षेत्रमा आएको विनाशकारी बाढीबाट प्रभावित नागरिकको राहत तथा उद्धारमा थप सहयोग पुगोस भन्ने उद्देश्यले पछिल्लो सहयोग गरिएको केन्द्रले जनाएको छ।

विपद्का समयमा प्रभावित परिवारको पीडामा साथ दिँदै सामाजिक संस्थाका तर्फबाट सक्दो सहयोग गर्दै आएको केन्द्रले जनाएको छ। केन्द्रको यो सहयोगले विपद्का बेला सामाजिक उत्तरदायित्व र मानवीय सहयोगको उदाहरण प्रस्तुत गरेको छ।