लुम्बिनी सांस्कृतिक नगरपालिका–१२, अजमा | मिति: २०८२ कार्तिक १९

परम्परागत धार्मिक र सांस्कृतिक मूल्यसँग जोडिएको कार्तिक पूर्णिमा (नहान) मेला यस वर्ष पनि लुम्बिनी सांस्कृतिक नगरपालिका–१२, अजमास्थित रामजानकी मन्दिर परिसरमा भव्य रूपमा सम्पन्न भएको छ।

सदियौँदेखि चलिआएको यो मेला आज बिहानैदेखि भक्तजनहरूको ठूलो भीडका साथ सुरु भएको थियो। नहान गर्न र दर्शनका लागि श्रद्धालुहरू बिहानैदेखि लामो लाइनमा उभिएका थिए।

मेलामा लुम्बिनी क्षेत्रका विभिन्न गाउँहरू — अजमा, निपनियाँ, सुनवल, आमहवा, आमा–आमी, भभाई, बन्जरही, वभनी, सुक्रौली, मुडिला, डिह, ओडवलिया, कालिदह, पैसिया, नन्दनगर लगायत स्थानहरूबाट आएका भक्तजनहरूले सहभागिता जनाएका थिए।

त्यस्तै छिमेकी देश भारतका गाउँहरू — लिलाडिह, झंगटी, भुझौली ‘ बूडा बूडी, मझगावां, सलहन्तपुर, फरसादीपुर, ककरहवा, मघरहिया लगायत स्थानहरूबाट पनि हजारौँको संख्यामा श्रद्धालु भक्तजनहरू सहभागी भएका थिए।

मेलाको सफल आयोजनाका लागि वडा कार्यालयले विशेष तयारी गरेको थियो। मेलाको शान्ति–सुरक्षा, सरसफाई र व्यवस्थापनका लागि वडा अध्यक्ष श्री हरिकेश लोध र वडा सचिव श्री सुनिल न्यौपानेको अगुवाइमा स्थानीय युवाहरू, प्रहरी प्रशासन तथा सामाजिक संघ–संस्थाहरूले सक्रिय सहयोग पुर्‍याएका थिए।

मेलाको सम्पूर्ण कार्यक्रम शान्तिपूर्ण र व्यवस्थित रूपमा सम्पन्न भएको वडा कार्यालयले जनाएको छ। कुनै पनि अप्रिय घटना नघटेको र मेलाको पवित्रता कायम रहनु सबैको अनुशासन र सहयोगकै कारण सम्भव भएको बताइएको छ।

धार्मिक आस्था, मेलमिलाप र सांस्कृतिक एकताको प्रतीकका रूपमा यो मेला यस वर्ष पनि सफल र प्रेरणादायी बनेको स्थानीय बासिन्दाहरूले बताएका छन्।